صديقى أنوبيس والمدونات

طبعا زى ما انتم عارفين قصة أوزيريس وأخوه ست انتهت وحورس قعد على العرش وإيزيس وصلت للى كانت عاوزاه وكل شىء تمام والحمد لله. طب وبعدين هقعد بقى هناك فى البر الغربى (مدينة الموتى) بالعالم الآخر حاطط ايدى على خدى؟!

بينى وبينكم فى يوم كنت قاعد مع الأخ (أنوبيس) طبعا عارفينة إله التحنيط اللى شبه ابن أوى (أو الذئب) المهم كنت قاعد معاه لقيته بيقول لى ايه رأيك يا أوزير يا أخويا فى المدونات اللى انتشرت اليومين دول على النت وايه رأيك فى الكلام اللى بيتكتب؟ أنا طبعا قلت له رأيى فى الحاجات اللى شفتها لكن اللى ما شفتهوش ما اعرفهوش وما بحبش افتى.

أنا شايف إن الظاهرة دى يا (أنو) يا أخويا (أنو ده اسم الدله بتاع أنوبيس) موجودة من زمان انت مش فاكر العيال ولاد الفراعنة لما كانوا بيكتبوا مدوناتهم على حيطان المعابد اللى أهاليهم تعبانين فيها؟؟ قال لى آه فاكر بس غلابة العيال على أيامينا كانوا مساكين اللى بيكتبوه كان بيتمسح أول بأول لكن اليومين دول كله على ودنه بيكتب وما حدش بيقول لحد انت بتعمل ايه؟

قلت له لا يبقى انت بقى مش متبع كويس لإن مدونين اليومين دول الوضع بالنسبة لهم أسوأ لو كان مدونين زمان كانت كتاباتهم بتتمسح وخلاص فمدونين اليومين دول بعيد عنك بيدخلوا السجن (بعيد عن السامعين)

المهم اتفقنا إننا لازم نعرف العالم ده (عالم المدوانت) فيه ايه وجاى منين ورايح فين

وطبعا لإن الناس مقامات قررت إنى أنا اللى اخوض التجربة دى وأعمل لى مدونة وأنا مش أقل من الملايين حول العالم اللى عاملين مدونات وهيبقى (أنو) صاحبى ورفيقى معايا هحكى له على اللى بيحصلى وهحكى لكم على طول على رأيه وتعليقاته