البداية

أعزائى...

أهلا بيكم ومرحبا معلش استقبال تقليدى أصلى لسه جديد فى كار (صنعة) التدوين

أحب اعرفكم بنفسى انا أوزيريس واللى عاوز يختصر أو يحب يدلعنى ممكن يقول لى (أوزير) وطبعا كلكم عارفين أوزيريس وعارفين قصته مع إيزيس وابنهم حورس هى دى بالظبط قصتى

مش عارف بصراحة لسه أنا هعمل هنا أيه وهكتب ايه ومش هكتب ايه وهتكلم عن نفسى ازاى يا ترى بالرمز يعنى بالإشارات والهمسات ولا هعمل ايه بالظبط مش عارف ... بس أهم شىء فعلا واللى حاسس بيه دلوقتى وأنا قاعد بكتب ونفسى أقول لكم عليه إنى حاسس إنى فرحان مش عارف ليه بس المهم إنى فرحان يمكن لإنى قريت نماذج جميلة لا مش جميلة وبس دى أقل وصف ممكن تتوصف بيه إنها جميلة

وهو ده اللى خلانى افكر أعمل مدونة

على العموم أنا طبعا محتاج خبراتكم ونصائحكم ما تترددوش تبعتولى ملاحظاتكم هكون سعيد بيها جدا حتى لو ما اخدتش بيها

وفى حالة تأخرى فى الكتابة وتحديث مدوناتى ما تفتكرونيش بطلت اكتب لا سمح الله (عدم الكتابة فى وجهة نظرى جريمة) لكن أنا ساعات بفضل اكتب كتابة صامتة زى اللى قال لنا عليها الشاعر نجيب سرور:

الصمت ليس هنيهة قبل الكلام

الصمت ليس هنيهة بين الكلام

الصمت ليس هنيهة بعد الكلام

الصمت لا يعنى سوى الصمت

وهل يعنى الجحيم سوى الجحيم

الصمت حرف لا يُخط ولا يُقال